ლიგის შესახებ

„მოყვარულთა ლიგა“ არის ოფიციალური სამოყვარულო საფეხბურთო ჩემპიონატი, დიდ ფეხბურთში (11x11), რომლის ორგანიზებასაც ახორციელებს საქართველოს სამოყვარულო ფეხბურთის ასოციაცია საქართველოს ფეხბურთის ფედერაციასთან ერთად, ხოლო პროექტის პარტნიორები არიან საქართველოს სპორტის სამინისტრო, ქართული ფეხბურთის განვითარების ფონდი, ქალაქ თბილისის მუნიციპალიტეტის მერია და, მთელი ქვეყნის მასშტაბით, ადგილობრივი მუნიციპალიტეტები. ასოციაციის გენერალური სპონსორია კომპანია „კროკობეთი“. 

მოყვარულთა ლიგა იმართება მთელი ქვეყნის მასშტაბით და აღიარებულია ევროპული ფეხბურთის მმართველი ორგანოს - UEFA-ს მიერ. ჩემპიონატი 2016 წლიდან ყოველწლიურად ტარდება და მასში მონაწილეობას რეგულარულად იღებს 500-მდე გუნდი და 14 000-ზე მეტი მოყვარული ფეხბურთელი, ხოლო საქართველოს საუკეთესო გუნდი, ტრადიციულად, ასპარეზობს ევროპის სამოყვარულო საფეხბურთო ჩემპიონატზე - UEFA Regions’ Cup და საქართველოს დავით ყიფიანის სახელობის თასის გათამაშებაში. 2024 წელს მოყვარულთა ლიგის გამარჯვებულმა გუნდმა კვლავ მიიღო მონაწილეობას ევროპის ჩემპიონატზე, გადალახა შესარჩევი ეტაპი და ეს იყო უკვე მეოთხე შემთხვევა, ხოლო დავით ყიფიანის თასზე სამოყვარულო საფეხბურთო კლუბი ჩაერთო ზედიზედ მესამედ, სადაც, აღსანიშნავია, რომ გუნდმა გადალახა ორი ეტაპი.

ჩემპიონატის მიზნებია: 

ა. ფეხბურთის მასობრიობის განგრძობადი ზრდა; ბ. ფეხბურთის შემდგომ განვითარება და პოპულარიზაცია; გ. ჯანსაღი და სპორტული ცხოვრების წესის დამკვიდრება და პოპულარიზაცია საზოგადოებაში; დ. სტაბილური, ყოველწლიური სამოყვარულო საფეხბურთო ლიგების რაოდენობის ზრდა, განვითარება და პოპულარიზაცია; ე. ნიჭიერი ახალგაზრდა ფეხბურთელების აღმოჩენა; ვ. სპორტული ინფრასტრუქტურის აღდგენა, ამოქმედება და განვითარება; ზ. ვეტერანი ფეხბურთელების დაბრუნება სპორტში; თ. დამწყები მწვრთნელებისა და მსაჯების პროფესიული განვითარების ხელშეწყობა; ი. UEFA REGIONS’ CUP-ის მონაწილე გუნდის კანდიდატების შერჩევა და მომზადება კ. საქართველოს დავით ყიფიანის თასზე მონაწილე გუნდის კანდიდატების შერჩევა, მომზადება და მონაწილეობა; ლ. სამოყვარულო ფეხბურთის მასშტაბური განვითარების ხელშეწყობა; მ. მოყვარულთა ლიგისა და, ზოგადად, მასობრივი სპორტის პრინციპებისა და ღირებულებების დანერგვა და პოპულარიზაცია; ნ. მასობრივი ფეხბურთის და, ზოგადად, ფეხბურთის, როგორც სპორტის სახეობის პრესტიჟის ამაღლება საზოგადოებასთან სწორი კომუნიკაციისა და მაღალი ხარისხის გაშუქების უზრუნველყოფით; ო. მოყვარულთა ლიგის მე-10 საიუბილეო სეზონის შესაბამისი აქტივობებისა და გაშუქების დაგეგმვა და განხორციელება.